कैलारीसे खाद्य तथा पोषण सुरक्षा रणनीति योजना बनैना
रणनीतिक योजना नइहुके गैरकिसान फाइदा लेलैः गाउँपालिका अध्यक्ष
पहुरा समाचारदाता
हसुलिया, ८ माघ । कैलारी गाउँपालिकासे खाद्य तथा पोषण सुरक्षा रणनीति योजना बनैना हुइल बा ।
याक नेपाल ओ सहास नेपालके संयूक्त आयोजनामे सोम्मार हसुलियामे हुइल खाद्य तथा पोषण सुरक्षा रणनीति योजनाके अवधारण तथा सान्र्दर्भिकता विषयक छलफल तथा अन्तरक्रिया कार्यक्रममे गाउँपालिका अध्यक्ष राजसमझ चौधरी हाली रणनीतिक योजना निर्माण कैना बटैलै ।
उहाँ कहलै, यहाँ खाद्य तथा पोषण सुरक्षा रणनीति योजना नइहुके गैरकिसान ढेर हावी हुइल बटै । वास्तविक किसानसे उत्पादन करल खाद्य वस्तुसे बजार मुल्य पैले नइहुइट । भारतसे खाद्य बस्तु तथा टिना आयत हुके यहाँके किसान मर्कामे परल गाउँपालिका अध्यक्ष बटैैलै ।
गाउँपालिका उपाध्यक्ष भगवतीकुमारी चौधरी बजार माग अनुसार किसानहे उत्पादन ओर उन्मुख करैना जरुरी रहल बटैली । यहाँके किसानसे उत्पादन कर बस्तु भण्डारण नइहुके उचित मुल्य नइपाइल बटैली । उहाँ कहली, सुरुमे किसानसे उत्पादन करल कौनोफे बस्तु बजारमे फालाफाल रहठ । भण्डारण कैना गोदाम नइहुके लागतसे सस्ता मोलमे विक्री कैना बाध्य हुइठै । अपनेहुकनहे आवश्यकता परेबेर महंगा मुल्यमे खरिद कैना बाध्य हुइठै ।
आर्थिक विकास समिति संयोजक तथा वडा नम्बर ५ के वडा अध्यक्ष विष्णु प्रसाद चौधरी यहाँके उत्पादन भारतके उत्पादनसंग प्रतिस्पर्धा करे नइसेक्के किसान तथा फार्म धमाधम बन्द हुइटील रहल बटैलै । उहाँ कहलै, कैलारी गाउँपालिकामे पहिले ढेर मुरगी फार्म रहे । भारतसे चोरी पैठारी करके नानल मुरगी सस्ता मुल्यमे विक्री हुके यहाँके फार्म ओ व्यवसायी पलाएयन हुके भारत वा विदेश जैना बाध्य हुइल बटै । प्रदेश सरकारके अनुदानमे अनुगमन नइहुके गैरकृषक फाइदा लेटी रहल बटैलै ।
वडा नम्बर ४ के वडा अध्यक्ष ठागुराम चौधरी छोट किसानहे अनुदान नइडेके गैरकिसान कागज मिलाके फाइदा लेटी रहल बटैलै । कृषि मुल्य तोक्न निकाय नइहुके किसानसे उत्पादन करल बस्तु लागत अनुसार मुल्य नइपाइल बटैलै ।
कार्यक्रममे सहास नेपालके कार्यकारी निर्देशक डा. सुरेन्द्रकुमार श्रेष्ठ, याक नेपालके कार्यकारी निर्देशक डबलबहादुर बम खाद्य तथा पोषण सुरक्षा रणनीतिक योजना नन्ना अब्बेक आवश्यकता हुइल बटैलै । ढेर स्थानीय तहसे रणनीतिक योजना नानसेकलफे बटैलै ।
याक नेपालके कार्यक्रम संयोजक विनोद सिंह खाद्य तथा पोषण सुरक्षाके अवस्था विषयक प्रस्तुती करल रहिट । कैलारी गाउँपालिकाके प्रमुख प्रशासकीय अधिकृत विर बहादुर ऐर सहास नेपाल ओ याक नेपालसे सहकार्य करके हाली रणनीतिक योजना बनैना बटैलै ।
कार्यक्रमके संचालन कैलारी गाउँपालिकाके सामाजिक विकास अधिकृत यगम कलेल करल रहिट । कार्यक्रममे वडा अध्यक्षहुक्रे तमान शाखाके प्रमुख, याक नेपाल ओ सहास नेपालके प्रतिनिधिहुकनके सहभागिता रहे ।
कैलारीके खाद्य तथा पोषण सुरक्षा योजना निर्माणके लाग कैलारी गापा ओ सहास नेपालके आर्थिक तथा याक नेपालके प्राविधिक सहयोग रहना निर्णयफे हुइल बा ।
