४५ दिने एडभान्स तह–२ सिलाई कटाई तालिम सुरु

पहुरा समाचारदाता
हसुलिया, १० माघ । कैलारी गाउँपालिका वडा नम्बर ५ बैजपुरमे ४५ दिने एडभान्स तह–२ सिलाई कटाई तालिम सुरु हुइल बा ।

कैलारी गाउँपालिका उद्यम विकास शाखाके आयोजनामे आर्थिक समृद्धिके आधार, लघु उद्यम मार्फत रोजगार कना मुल नाराके साथ गरिवी निवारणका लागि लघु उद्यम कार्यक्रम अन्र्तगत एडभान्स तह–२ सिलाई कटाई तालिम सुरु हुइल हो ।

कैलारी गाउँपालिका उपाध्यक्ष भगवतीकु्मारी चौधरीके वडका पहुनामे हुइल कार्यक्रममे उहाँ तह–१ लेहुइयाहे व्यावसायिक रुपमे आघे बह्राइक लाग तह–२ तालिमके व्यवस्था करल बटैली ।

उहाँ कहली, ‘तह–१ लेहल कोईफे अपन घल्ना लुगरा सिए सेक्ठै मने व्यावसायिक रुपमे आघे बह्रे लाग ओ माग अनुसार लुगरा सियक लाग तह–२ जरुरी रहठ । यी तालिम पश्चात ढेर महिला अपनही व्यवसाय करे सेक्ही ।’

कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरीके अध्यक्षतामे हुइल कार्यक्रममे वडा सदस्य अनारकली चौधरी, उद्यम विकास शाखाके निर्मला चौधरी लगायतके सहभागिता रहे । कार्यक्रमके संचालन उद्यम विकास शाखा प्रमु्ख प्रदीप चौधरी करल रहिट ।