योजनाके काम समयमे सम्पन्न कैना निर्देशन

पहुरा समाचारदाता
हसुलिया, १७ माघ । पालिकास्तरीय अनुगमन समितिसे कैलारी गाउँपालिकाके वडा नम्बर १ ओ ३ संचालित दु्ई योजनाके अनुगमन करटी काम समयमे सम्पन्न कैना निर्देशन डेले बा ।

पालिकास्तरीय अनुगमन समितिके संयोजक भगवतीकुमारी चौधरीके नेतृृत्वमे बुधके रोज स्थलगत अनुगमन कैगिल हो । कैलारी गाउँपालिका वडा नम्बर १ के कार्यालय भवन ओ वडा नम्बर ३ लालपुरमे सडकमे माटो पटानी योजनाके अनुगमन कैगिल योजना शाखा प्रमुख सन्तोषकुमार चौधरी जनैलै ।

अनुगमनमे क्रममे समितिके संयोजक भगवती कुमारी चौधरी वडा कार्यालय भवन निर्माणके ठेक्का लेहुइया निर्माण कम्पनीहे हाली सम्पन्न कैना निर्देशन डेले बटी । ओस्टेक वडा नम्बर ३ लालपुरमे सडकमे माटो पटानीके काम ओराइल मने माटी मजा नइमिलल ओरसे सडकमे माटी पटानीके फिनिसिङहे थप सुधारके कैनाफे उपभोक्ता समितिहे निर्देशन डेले बटी ।

उ योजनाके अनुगमनमे पालिकास्तरीय अनुगमन समितिकके संयोजक भगवतीकुमारी चौधरी, वडा–६ के वडा अध्यक्ष प्रेमबहादुर चौधरी, समितिके सदस्य सुनिला चौधरी, योजना शाखा प्रमुख सन्तोषकुमार चौधरी, लालबहादुर विक, प्राविधिक असिस्टेन्ट सबइन्जिनियर हिमाल कुश्मीलगायतके उपस्थिति रहे ।