कान्ति मावि पहलमानपुरके ७२ औं वार्षिक उत्सव कार्यक्रम
पहुरा समाचारदाता
पहलमानपुर, २० माघ । कैलालीके घोडाघोडी नगरपालिका १० पहलमानपुरमे रहल कान्तिराज्यलक्ष्मी माध्यमिक विद्यालयके ७२ औं वार्षिक उत्सव तथा अभिभावक दिवस कार्यक्रम सम्पन्न हुइल बा ।
विद्यालयसे शुकके रोज टमान कार्यक्रमके आयोजना करके वार्षिकोत्सव तथा अभिभावक दिवस मनाइल हो । उ विद्यालयके शिक्षक अभिभावक संघके अध्यक्ष नारायण कार्कीके सभापतित्वमे हुइल कार्यक्रमके वरका पहुना घोडाघोडी नगरपालिकाके नगर प्रमुख खडकबहादुर रावत रहल रहिट ।
ओस्टेक करके कार्यक्रममे खास पहुना नगर उपप्रमुख गुलिया कुमारी चौधरी ओ शिक्षा शाखा प्रमुख खगेन्द्र बहादुर सिंह रहल रहिट । कान्ति माध्यमिक विद्यालयके लेखापाल देविदयाल कठरिया २ करोड ९१ लाख ४६ हजार बराबरके आर्थिक प्रतिवेदन प्रस्तुत करल कार्यक्रमममे वार्षिक प्रगति प्रतिवेदन विद्यालयके प्रधानाध्यापक उमाकान्त मिश्र प्रस्तुत करल रहिट ।
उ वार्षिकोत्सवके अवसरमे विद्यालयहे विशेष सहयोग करल व्यक्तित्व तथा सेवा निवृत शिक्षकहुकनहे सम्मान करल बा । यकर साथे अर्धवार्षिक परिक्षामे पहिल, दुसर ओ टिसरा हुइल, अतिरिक्त क्रियाकलापके उत्कृष्ट विद्यार्थीहुकनहे पुरस्कार वितरण समेत करल बा ।
कार्यक्रममे लागुपदार्थ दुव्र्यसनी सम्बन्धी सचेतनामुलक नाटक प्रस्तुत, स्वास्थ्य सचेतना सम्बन्धी प्रर्दशनीलगायत विद्यार्थीहुकनके प्रतिभा प्रस्तुत करल रहे । उ वार्षिकोत्सव कार्यक्रममे विद्यार्थी, अभिभावक लगायत टमान विद्यालयके शिक्षक ओ जनप्रतिनिधीहुकनके सहभागिता रहल रहे । उ कार्यक्रमके सञ्चालन शिक्षक नरबहादुर देउवा करल रहिट ।
