कैलारीके के गाउँमे धार्मिक महोत्सव महायज्ञ सुरु
पहुरा समाचारदाता
हसुलिया, २१ फागुन । कैलाली जिल्लाके कैलारी गाउँपालिका वडा नम्बर ४ के गाउँमे ज्ञानविज्ञान सप्ताह धार्मिक महोत्सव महायज्ञ २०८० सुरु हुइल बा ।
के गाउँ शिव मन्दिर ज्ञान विज्ञान सप्ताह धार्मिक महोत्सव महायज्ञके आयोजनामे सोम्मारे अइना फागुन २७ गतेसम संचालन रना ज्ञानविज्ञान सप्ताह धार्मिक महोत्सव महायज्ञके उदघाटन कार्यक्रमके वरका पहुना तथा कैलारी गाउँपालिका अध्यक्ष राजसमझ चौधरी एक समरोहके विच दिप प्रज्वलन ओ व्यानर बाचनके करल रहिट ।
उदघाटन कार्यक्रममे सम्बोधन करटी उहाँ शान्ति ओ ज्ञान प्राप्तीके लाग महायज्ञके भारी महत्व रहल बटैलै । उहाँ कहलै, ‘मनै धनदौलत जटरा कमैलेसेफे जेकर मनमे शान्ति नइहो कलेसे धनसम्पति कैनो काम नइलग्ना, अन्तिम अवस्थामे सक्कु जाने मन शान्तिके डगर खोजल डेखजाइठ ।’ गाउँपालिका अध्यक्ष महायज्ञके सफलताके कामनाफे करलै ।
कार्यक्रमके विशिष्ट पहुना वडा नम्बर ४ के वडा अध्यक्ष ठागुराम चौधरी एक हप्तासम हुइना महायज्ञहे भव्य ओ सभ्य बनैना आग्रह करलै । कार्यक्रममे जनकल्याण मावि के गाउँके शिक्षक केवी जोशी, वडा सदस्य सुवा परियारलगायतसे मन्तव्य व्यक्त करल रहिट । महासिंह ओडके अध्यक्षतामे हुइल उदघाटन कार्यक्रमके संचालन सुनिता चौधरी करल रहिट । उहीसे आघे स्थानीय ओ विद्यार्थीहुकनसे कलश यात्रा निकारगिल रहे । महायज्ञके मुख्य बाचक श्री अच्युतशरण महाराज रहल बटै ।
