लैङिक समानता तथा सामाजिक समावेशीकरण परामर्श कार्यशाला
पहुरा समाचारदाता
हसुलिया, २३ फागुन । ११४औं अन्तर्राष्ट्रिय महिला दिवसके अवसरमे बुधके रोज कैलारीके हसुलियामे लैङिक समानता तथा सामाजिक समावेशीकरण परामर्श कार्यशाला हुइल बा ।
कैलारी गाउँपालिकाके आयोजना ओ यूएसएड जल जंगल कार्यक्रमके आर्थिक तथा प्राविधिक सहयोगमे ‘महिलामा लगानीः सभ्य र समुन्न समाजको थालनी’ कना मुल नाराके साथ लैङिक समानता तथा सामाजिक समावेशीकरण परामर्श कार्यशाला हुइलक हो ।
कैलारी गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे उहाँ वनजंगल संरक्षणमे महिलाहुकनके भारी हात रहल मने लैङिक समानता तथा सामाजिक समावेशीकरणमे महिलाहुकनहे पाछे पारल बटैली । उहाँ कहली, ‘महिला नेतृत्व लेहल सामुदायिक वन प्रगती करल डेखजाइठ । पारदर्शिता ओ सुशासनफे रहठ मने अभिनफे सामुदायिक वन उपभोक्ता समुहके कार्यसमिति बनाईबेर कोषाध्यक्ष या सदस्य डेना प्रचलन रहल बा ।’ ग्रामीण क्षेत्रमे महिलाहुकनहे काठी पाता कैना, चुल्हा चौकामे सीमिति राखल कारण महिलाहुक्रे नेतृत्वमे पुगे नइसेकल उपाध्यक्ष बटैली ।
कार्यक्रमके उदेश्य ओ यूएसएड जल जंगल कार्यक्रमबारे टिम लिडर भाष्कर भट्टराई करल रहिट । अन्तर्राष्ट्रिय महिला दिवसके महत्व ओ प्राकृतिक स्रोतमे महिला, दलित, जनजाती, अपाङता तथा लैङिक अल्प संख्यक समुदायके पहुँच लगागत विषयबस्तुमे यूएसएड जल जंगल कार्यक्रमके सि. जेसी अधिकृत लोकबहादुर नेपाली प्रस्तुतीकरण करल रहिट ।
कार्यक्रममे सहजीकरण करटी कैलारी गाउँपालिकाके महिला बालबालिका तथा जेष्ठ नागरिक शाखा प्रमुख बालकुमारी चौधरी शाखाके आर्थिक बर्ष २०८०÷०८१ के स्वीकृत बार्षिक कार्यक्रम ओ हालस सम्पन्न गथिविधि प्रस्तुत सम्पादन प्रस्तुत करल रहिट । कार्यक्रममे सहभागीहुकनके ओरसे वडा नम्बर ५ के वडा अध्यक्ष विष्णु चौधरी, कार्यपालिका सदस्य सुनिला चौधरी, कौशी बोहरा, विष्णु चौधरी, चम्फा बोहरा, हिरा चौधरी, गीता चौधरी अब्बेक समस्या ओ वर्तमान अवस्था बारे आ अपन बाट राखल रहिट । बाट रखुइयाहुक्रे महिलाहुक्रे विभेदमे परल ओ लैङिक समानता तथा सामाजिक समावेशीकरणमे जोर डेहल रहिट ।
