समयमे योजना सम्पन्न करेक लाग उपभोक्ता समितिसे अभिमुखीकरण

पहुरा समाचारदाता
हसुलिया, २३ फागुन । समयमे योजना सम्पन्न करेक लाग उपभोक्ता समितिके पदाधिकारीहुकनहे योजना कार्यान्वयन सम्बन्धी एक दिने अभिमुखीकरण तालिम डेहल बा ।

कैलारी गाउँपालिकाके आयोजनामे वडा नम्बर १ मे संचालित योजनाके उपभोक्ता समितिके पदाधिकारीहुकनहे योजना कार्यान्वयन सम्बन्धी एक दिने तालिम बुधके रोज तालिम डेगैल योजना शाखा प्रमुख सन्तोषकुमार चौधरी बटैलै ।
यिहे आर्थिक बर्षमे सम्झौता हुइल योजनाके उपभोक्ता समितिके पदाधिकारी (अध्यक्ष, सचिव, कोषाध्यक्षहुकनहे तालिम डेहल उहाँ बटैलै ।

तालिममे योजनाके भुक्तानी प्रक्रिया, बजेट निर्माण, बस्ती भेला, योजना छनौट प्रक्रिया, समयमे योजना सम्पन्न कैना प्रक्रिया, कौन रकम फ्रिज जैना, कौन रकम फ्रिज नइजैना, विल भपाई, कागजात मिलैना प्रक्रियाबारे जानकारी डेहल बा ।
तालिम उदघाटन कार्यक्रमके अध्यक्षता ग्रहण करल वडा नम्बर १ के वडा अध्यक्ष धोजहरि पाल बोहरा उपभोक्ता समितिके पदाधिकारीहुकनहे योजनाके बजेट अनुसार समयमे काम कैना निर्देशन डेहल रहिट ।

वडा नम्बर १ मे संचालित १० ठो योजनाके उपभोक्ता समितिके अध्यक्ष, पदाधिकारीहुकनके सहभागिता रहे । कार्यक्रममे वडा सदस्य लिलापति चौधरी, पुष्पा भुलके सहभागिता रहे । तालिमके मुख्य प्रशिक्षक योजना शाखा प्रमुख सन्तोषकुमार चौधरी ओ असिस्टेन्ट सबइन्जिनियर निर्मल चौधरी करल रहिट ।