सामुदायिक विद्यालयमे संस्कार बाः गाउँपालिका अध्यक्ष

पहुरा समाचारदाता
हसुलिया, २५ फागुन । कैलारी गाउँपालिकाके हसुलियामे श्री दिपेन्द्र माविके ४७ औं बार्षिकोत्सव तथा अभिभावक दिवस विफेक रोज एक समारोहके विच मनागिल बा ।

कैलारी गाउँपालिका अध्यक्ष राजसमझ चौधरीके बरका पहुनामे हुइल कार्यक्रममे उहाँ सामुदायिक विद्यालय संस्कार सिखैनामे अग्रसर रहल बटैलै । उहाँ कहलै, ‘संस्थागत विद्यालयमे रटैना, घोकैना प्रकृति बा । मने सामुदायिक विद्यालयमे संस्कार सहितके शिक्षा डेहल अवस्था बा ।’

कैलारी गाउँपालिकाके अग्रणी सामुदायिक विद्यालय दिपेन्द्र माविमे पह्राईमे सुधार हुइटी गैल, स्थानीयस्तरमे खानपान पकाई व्यवहारमे लागु कराइल, एनसिसी लागुसे विद्यालय ओ विद्यार्थीनहे अनुशासन बह्रल बटैलै ।
कैलारी गाउँपालिकासे शिक्षा, स्वास्थ्य ओ कृषिमे ध्यान डेले बा,’ गाउँपालिका अध्यक्ष कहलै, ‘विद्यालयके जिर्ण भवनके मर्मत, अधुरा भवनके निर्माण ओ भौतिक पूर्वाधार रहल विद्यालयमे थप भवन बनाजैटी रहल बा । स्वास्थ्य क्षेत्रमे स्थानीयहुकनके सहजुल सेवा लेहे सेकिट । कोइफे उपचार विना ज्यान गुमाई नपरे कहटी निशुल्क रगतके व्यवस्था, सुत्केरी महिलाके लाग बाहेर जैना अवस्था रहलेसे निशुल्क एम्बुलेन्सके व्यवस्था ओ कृषिहुकनहे मालमोतमे आधा छुटल करल बा ।’

कार्यक्रममे कैलारी उद्योग बाणिज्य संघके अध्यक्ष नेपालु चौधरी दिपेन्द्र मावि पालिकाके अग्रणी सस्था रहल कारण यहाँ बहुमुखी क्याम्पस बने पर्ना बटैलै । शिक्षक अभिभावक संघके अध्यक्ष विसराम चौधरी दिपेन्द्र माविमे चारुओर बाउन्डरी कैना आवश्यक रहल ओ पालिकाहे सहयोग डेना आग्रह करलै । विद्यार्थीके पह्राईहे सुधार करेक लाग शिक्षक संगे अभिभावहुकनहेफे ध्यान डेहे पर्ना जरुरी रहल बटैलै ।

कार्यक्रममे अभिभावक विमला चौधरी, खल्लु बखरिया, शेरसिंह कार्की, पार्वती चौधरीहे सम्मान कैगिल बा । ओस्टेक करके शिक्षकमे प्लस टु संयोजक पिरमराज पन्त, नाराण प्रसाद ढकाल, लक्ष्मी प्रसाद चौधरी, लिला चौधरीहे सम्मान कैगिल बा ।

कार्यक्रममे विद्यालयके प्रअ विनोद भट्टराई विद्यालयके प्रगती विवरण प्रस्तुत करल रहिट । दिपेन्द्र माध्यमिक विद्यालय हसुलियाके विकास क्रम स्थापनाकालसे टमान नामसे परिवर्तित हुइटी आइल बटैलै । यकर विकास क्रमके पहिल नामाकरण “नेपाल राष्ट्रिय प्राथमिक पब्लिक स्कुल“ रहे । जौन यी क्षेत्रके तत्कालिन शिक्षा प्रेमी तथा समाजसेवी स्व. हरिलाल चौधरीके सक्रियतामे वि.स. २०१० सालमे विचैपुर गाउ पञ्चायत बसौटी भररीमे स्थापना हुके वि.स. २०१४ सालमे प्रा. वि. तहके स्वीकृति प्राप्त करल ।

समयके परिवर्तनसंगे २०३० सालमे अस्थाके देवी कालि (कालिमाई) के नामसे “श्री कालिका नि.मा.वि. भररी कमलपोखरी“ नामाकरण कैगिल रहे । मा.वि. तह समके स्थानीय आवश्यकता महसुस करके २०३२÷२०३३ सालमे तत्कालिन गाउँ पञ्चायत प्रधानपञ्च स्व. रामनाथ चौधरीके सक्रियतामे मा.वि. सञ्चालनार्थ माननीय भू.पू. मन्त्री स्व. छिमानन्द महतोसे प्रदान करल लगभग ३ बिगाहा क्षेत्रफलमे विद्यालय भवन निर्माण कैगिल बा ।

२०३४ सालमे तत्कालिन हसुलिया गाउँ पञ्चायतके प्रधान पञ्च चन्द्रबहादुर गुरुङके सक्रियतामे यी विद्यालयके ‘श्री दिपेन्द्र मा.वि.’ नामाकरण करके मा.वि. तहके स्वीकृक्ति प्राप्त करके पठन–पाठन कार्य सुरु करल रहे । समयके विकासक्रमसंगे यी क्षेत्रमे कक्षा ११ ओ १२ शिक्षा आवश्यकता महसुस करके वि.स.२०६२÷०६३ सालमे तत्कालिन वि.व्य. स अध्यक्ष स्व.श्री राजेशकुमार चौधरीके अगुवाई ओ यी क्षेत्रके समाजसेवी, बुद्धिजिवी, राजनितिज तथा शिक्षकके सक्रिय सहयोगमे २०६४ सालमे उच्च माध्यमिक शिक्षा परिषद केन्द्रिय कार्यालय सानोठिमी भक्तपुरसे उ.मा.वि. तहके सम्बन्धन प्राप्त करके कक्षा १२ समके अध्यापन कार्य करटी आइल बा ।

विद्यालयमे धनटीका युगान्त अक्षयकोष २०७२, अंगे्रजी भाषामे पह्र्रा संचालन करल, नेपाल दुर संचार सस्थानसे प्राप्त आईसिटी ल्याव रहल, नवजीवन सेवा संध धनगढी, कैलालीसे प्राप्त ९ थान कम्प्युटर ओ प्रदेश सरकारसे प्राप्त आईसिटी समेत जडान करल व्यवस्थित, आधुनिक कम्प्युटर ल्याब रहल बा ।
विद्यालयमे विज्ञान सामग्री, आधुनिक विज्ञान प्रयोगशाला, नेपाल सरकारके ससर्त अनुदान अन्तर्गत कैलारी गा.पा.से प्राप्त पुस्तकालय, शैक्षिक सत्र २०८० मे कैलारी गापा अध्यक्षके पहलमे यी विद्यालयमे राष्ट्रिय सेवा दल (एनसिसि) कार्यक्रम परल ओ नेपाली सेनाके ओरसे सफलता करल बा ।

बालबालिकाहुक्रे भविष्यके कर्णधार हुइट ओइनमे रहल बहुमुखी प्रतिभाके प्रस्फुटन कराके ओइनके भविष्य सुनिश्चित कैना ओ सु–योग्य नागरिकके लाग आधार तयार कैना सचेत रहल उहाँ बटैलै । विद्यालयके वातावरण स्वच्छ बनाके अपन लर्कनके भविष्य सुनिश्चित कैना लर्कनके पठन पाठनके लाग घरमे समेत वातावरण निर्माण करटी समय समयमे विद्यालयमे आके अपन लर्कनके पढाईप्रति चासो देखाके सल्लाह, सुझाव, सहयोग प्रदान कैना डेना उहाँ आग्रहफे करलै ।

विद्यालयके लेखापाल नरेशकुमार चौधरी १ करोड ९५ लाख ६९ हजार ९१९ रुप्या ४७ बराबरके आय व्यय प्रस्तुत करल रहिट ।
विद्यालय व्यवस्थापन समिति अध्यक्ष विरप्रसाद चौधरीके अध्यक्षतामे हुइल कार्यक्रममे स्वागत मन्तव्य प्लस टु संयोजक पिरमराज पन्त, थारु भाषामे स्वागत मन्तव्य एलिसा चौधरी, नेपाली भाषामे रिता चौधरी ओ अंग्रेजी भाषामे सिमरन चौधरी डेहल रहिट । कार्यक्रममे विद्यार्थीहुकन ओ एनसिसिके टोलीसे टमान प्रस्तुती प्रर्दशन करल रहिट ।

कार्यक्रमके संचालन शिक्षक नारायण प्रसाद ढकाल करल रहिट । कार्यक्रममे टमान विद्यालयके प्रअ, व्यवस्थापन समितिके पदाधिकारी, अभिभावकहुकनके सहभागिता रहल रहे ।