कैलारी–२ मे निशुल्क स्वास्थ्य शिविर

पहुरा समाचारदाता
हसुलिया, २६ फागुन । कैलारी गाउँपालिका वडा नम्बर २ विचैपुरके राष्ट्रिय माविमे शनिच्चरके रोज निशुल्क स्वास्थ्य शिविर सम्पन्न हुइल बा ।

कैलारी गाउँपालिकाके आयोजना तथा नवजजीवन सेवा संघ, माया मेट्रो अस्पताल, नेपाल नेत्र ज्योति संघ धनगढीके सहकार्यमे निशुल्क स्वास्थ्य शिविर हुइल हो । कैलारी गाउँपालिका उपाध्यक्ष भगवतीकुमारी चौधरीके बरका पहुनामे हुइल उदघाटन कार्यक्रममे उहाँ बालबालिका, महिला, जेष्ठ नागरिकहे ढेर ध्यान डेहे पर्ना बटैले रही ।

उहाँ कहली, ‘गाउँ घर आर्थिक अभावमे ढेर जाने चेकजाँच ओ उपचार कराई नईसेक्के रोगहे पालके बैठना बाध्य बटै । नवजजीवन सेवा संघ, माया मेट्रो अस्पताल, नेपाल नेत्र ज्योति संघ धनगढीके सहकार्यमे निशुल्क शिविरहे ढेर जाने निशुल्क सेवा पैना अवस्था आइल यकर लाग उ सक्कु संघ संस्थाहे धन्यबाद बा ।’ गाउँपालिका यी संघ संस्थाहे सदैव सहकार्य करटी आघे बह्रनाफे उहाँ बटैली ।

वडा नम्बर २ के वडा अध्यक्ष विकास चौधरीके अध्यक्षतामे हुइल कार्यक्रममे कार्यपालिका सदस्य टिका चौधरी भूल, विद्यालयके प्रअ लगायत स्थानीय बुद्धिजिवी, संघ संस्थाके प्रतिनिधिहुकनहे सहभागिता रहल रहे । निशु्ल्क शिविरहे ४४१ जाने टमान मेरिक निशुल्क सेवा लेहल नवजीवन सेवा संघके फिल्ड संयोजक प्रविन श्रेष्ठ जनैलै । शिविरमे आँखी, जाँच, नाक, कान, घाँटी लगायत टमान जाँच कैगिल उहाँ बटैलै ।