थारु रत्गैंया परिवार समाजके राष्ट्रिय चौठा गोत्यार सम्मेलन आज हुइना

पहुरा समाचारदाता
धनगढी, २८ फागुन । गोत्र पहिचान ओ कला संस्कृति पहिचान संरक्षणके लाग सोम्मारके रोज थारु रत्गैंया परिवार समाजके केन्द्रीय राष्ट्रिय चौठा गोत्यार सम्मेलन हुइटी रहल जनागिल बा ।

अँटवारके रोज सम्मेलनके तयारीबारे जानकारी डेहक लाग धनगढीमे कैगिल पत्रकार सम्मेलनमे नेपालके प्रदेशमे रहल ओ भारतके कुछ ठाउँमे रहल थारु रत्गैंयाहुकनके सहभागितामे राष्ट्रिय सम्मेलन हुई जैटी रहल समाजके केन्द्रीय अध्यक्ष पृथ्वी रत्गैंयाथारु जानकारी डेलै ।

रत्गैंया थारुनके विशेष पहिचानके रुपमे छोटकी डसिया व बरुवा पुजा रहल कहटी यिहीहे बचैनाके साथे संस्कृति संरक्षणके लाग सम्मेलन करे जैटी रहल उहाँ बटैलै । सम्मेलन धनगढी उपमहानगरपालिका–६ जाली पिपलचोक थारु देउथान लग्गे हुइना जनागिल बा ।