रत्गैंया थारुनके राष्ट्रिय सम्मेलन

राज्यके हरेक निकायमे थारु रत्गैंयाके उपस्थिति हुइना जरुरी ः पूर्व राज्यमन्त्री चुनकुमारी

पहुरा समाचारदाता
धनगढी, २८ फागुन । गोत्र पहिचान ओ कला, संस्कृति, संरक्षणके लाग थारु रत्गैंया परिवार समाजके केन्द्रीय राष्ट्रिय चौठा गोत्यार सम्मेलन सोम्मारके रोज कैलालीके जाली गाउँमे हुइल बा ।

सुदूरपश्चिम प्रदेशके पूर्व भौतिक पूर्वाधार विकास राज्यमन्त्री चुनकुमारी चौधरी (रत्गैंया) राज्यके हरेक निकायमे थारु रत्गैंया समुदायके उपस्थिति हुई पर्ना बटैे बटी । सोम्मारके कैलालीके धनगढी उपमहानगरपालिका ६ जालीमे थारु रत्गैंया समाजसे आयोजना करल चौठा राष्ट्रिय सम्मेलनके उदघाटन करटी यैसिन बटाइल रहिट ।

कार्यक्रममे थारु रत्गैंयाके हरेक क्षेत्रमे पहिचान हुइना जरुरी रहल ओ यकर लाग यूवा पुस्ता जागरुक हुके लागे पर्ना बेला आसेकल बटैली । रत्गैंया समाजसे राजनीतिक क्षेत्रमे आघे बढे पर्ना बटैटी अइना निर्वाचनमे हरेक तहमे उपस्थिति बढैना करके लैजाई पर्ना कहले बटी । देश परिवर्तन ओ विकासके लाग रत्गैंया परिवारसे अभियान सञ्चालन कैना आवश्यक रहल उहाँ बटैली । ओस्टेक रत्गैयाके पहिचान,आपसी सद्भाव,भाइबन्दुके खोजी कैना सम्मेलनके उदेश्य रहल उहाँक कहाई बा ।

सम्मेलनमे टमान जिल्लाक रत्गैंया परिवारके जेष्ठ नागरिकहे दोसल्ला ओढाइ सम्मान करल रहे । कलेसे थारु राष्ट्रिय कलाकारहुक्रे बेजोड प्रस्तुति राखल रहिट ।

कैलाली,कञ्चनपुर,बाँके,बर्दिया,दाङ ओ सुर्खेतमे करके २ हजार ६ सय ९४ रत्गैंया घरधुरी रहल ओ १३ हजार ६ सय ८३ जनसंख्या रहल समाज जनैले बा ।

रत्गैंयाथारुनके विशेष पहिचानके रुपमे रलक छोटकी डसिया ओ बरुवा पुजाहे बचैनाके साथे कला, संस्कृति संरक्षणके लाग सम्मेलनके आयोजना करल केन्द्रीय अध्यक्ष पृथ्वी रत्गैंयाथारु जानकारी डेलै । उदघाटन कार्यक्रममे उहाँ रत्गैयाथारुहुकनके उत्पति ओ रितिरिवाजके बारे जानकारी डेहल रहिट ।

सम्मेलनमे दाङ, बाँके, बर्दिया, कैलाली, कञ्चनपुर, सुर्खेत, नवलपरासीलगायत भारतसेफे रत्गैंयाथारुहुकनके सहभागिता हुइल रत्गैंयाथारु परिवार समाजके केन्द्रीय महासचिव महेश रत्गैयाथारु जनैलै ।