किशोरी परियोजनासे किशोरीनके नेतृत्व विकास करटी

पहुरा समाचारदाता
हसुलिया, ३० फागुन । शिकवल फाउण्डेसन नेपालके किशोरी परियोजना कार्यक्रम अन्तर्गत किशोरीहुकनके नेतृत्व विकासमे सहयोग पुगैटी रहल बा ।

कैलारी गाउँपालिकाके दिपेन्द्र माविके कक्षा ११ ओ १२ मे अध्ययनरत रहल किशोरीहुकनके नेतृत्व विकास तथा क्षमता अभिवृद्धिके लाग चार विधामे चार महिना तालिम डेजैटी रहल बा । २० जाने किशोरीहुकनके लाग हप्ताके एक दिन डेजैना तालिम गैल माघ १६ गतेसे सुरुवात हुके बैशाससम चल्ना शिकवल फाउण्डेसन नेपालके फिल्ड संयोजक सविता चौधरी बटैली ।

किशोरीहुकनहे डिजिटल साक्षरताबारे दिपेन्द्र माविके शिक्षक नारायण ढकाल प्रशिक्षण डेल रहिट । वित्त साक्षरताबारे नरेश अवस्थी, प्रजनन स्वास्थ्यबारे मेनका ओड ओ अन्तर व्यक्तित्वबारे कैलारी गाउँपालिका महिला तथा बालबालिका शाखा प्रमुख बालकुमारी चौधरी प्रशिक्षण डेले बटी ।

चार महिनासम संचालन हुइना तालिमके डिजिटल साक्षरता, अन्तर व्यक्तित्व विधाके तालिम समापन हुइल बा । वित्त साक्षरता विषयमे तालिम जारी रहल ओ प्रजनन स्वास्थ्यबारे अइना शुकके रोजसे सुरु हुइना शिकवल फाउण्डेसन नेपालके फिल्ड संयोजक चौधरी बटैली ।