कैलारी ओ गौरीगंगासे संयूक्त रुपमे दमकल खरिद कैना सहमति

पहुरा समाचारदाता
हसुलिया, ६ चैत । कैलारी गाउँपालिका ओ गौरीगंगा नगरपालिका संयूक्त रुपमे बरुण यन्त्र (दमकल) खरिद कैना सहमति हुइल बा ।

मंगरके रोज कैलारी गाउँपालिका अध्यक्ष राजसमझ चौधरी ओ गौरीगंगा नगरपालिकाके नगर प्रमख देवीदत्त कँडेल संयूक्त रुपमे दमकल खरिद कैना सहमति हुइल कैलारी गाउँपालिकाके प्रवक्ता दिपेन्द्रबहादुर बम जानकारी डेलै । दमकल खरिदके लाग दुनु पालिका ३०÷३० लाख रुप्या व्यहोर्ना उहाँ बटैलै । दमकल ४ हजार लिटर क्षमता रना बा ।

छलफल कार्यक्रममे कैलारी गाउँपालिकाके प्रमुख प्रशासकीय अधिकृत लक्ष्मी दत्त भट्ट, गौरीगंगा नगरपालिकाके प्रमुख प्रशासकीय अधिकृत धर्मराज विनाडी, कैलारी गाउँपालिकाके प्रवक्ता तथा तथा वडा नम्बर ७ के वडा अध्यक्ष दिपेन्द्रबहादुर, वडा नम्बर ५ के वडा अध्यक्ष विष्णु प्रसाद चौधरी, प्राविधिक भरत चन्दलगायतके सहभागिता रहे । दमकल दुनु पालिकाहे सिमानामे रख्ना सहमति हुइल बा ।

स्थानीय चुनावके मुहमे २०७९ साल बैशाख ११ गते कैलारी गाउँपालिका वडा नम्बर ७ विपतपुर मुक्तकमैया बस्तीमे भिषण आगलागीसे २७ घर पूर्णरुपमे जरके भुवा बनल रहे । कलेसे बस्तीमे रहल ८४ घरमे समेत क्षति पुगल रहे । स्थानीय पालिकामे दमकल नइहुइलक कारण बस्तीमे लागल आगी नियन्त्रणमे लेहे नइसेक्के भारी क्षति पुगल रहे ।