तीन महिने आधारभूत सिलाई कटाई तालिम सुरु

पहुरा समाचारदाता
हसुलिया, ६ चैत । कैलारी गाउँपालिका–४ के गाउँमे मंगरके रोजसे तीन महिने आधारभूत सिलाई कटाई तालिम सुरु हुइल बा ।
सीप सिखी आत्म निर्भर बनी कना मुल नाराके साथे लक्षित वर्ग कार्यक्रम अन्र्तगत दलित महिलाहुकनके उत्थानके लाग तीन महिने आधारभूत सिलाई तालिमके सुरु हुइल हो ।

कैलारी गाउँपालिका वडा नम्बर ४ ओ सहास नेपालके सहयोगमे संचालन हुइल तीन महिने आधारभूत सिलाई तालिमके उदघाटन कैलारी गाउँपालिका उपाध्यक्ष भगवतीकुमारी चौधरी करल रहिट । तालिमके उदघाटन करटी गाउँपालिकासे महिलाहुकनके उद्यमी बनैना लक्ष्य लेहल बटैली । उहाँ कहली, ‘महिलाहुकनके उप्पर उठाई आयआर्जन ओ आर्थिक शसक्तीकरण कैना जरुरी बा । आर्थिक रुपमे कम्जोर रहल महिला घरेलु हिंसामे परल बटै ।’ उहाँ सिलाई कटाई मजा सिखलेसे मजा आम्दानी करे सेक्ना बटैली ।

तालिम उदघाटन कार्यक्रम वडा नम्बर ४ के वडा अध्यक्ष ठागुराम चौधरीके अध्यक्षतामे हुइल रहे । उहाँ तालिम मजासे सिखके अपने व्यवसाय संचालन करे सेक्लेसे तालिम सार्थकता पैना बटैलै । कार्यक्रममे कैलारी गाउँपालिका स्वास्थ्य शाखा प्रमुख नरेशकुमार चौधरी, सहास नेपालके परियोजना अधिकृत नरेश चौधरी, कार्यपालिका सदस्य लालबहादुर विक, वडा सदस्य लक्ष्मी चौधरी, हरिद्वारी चौधरी, सुवा परियारलगायतके सहभागिता रहे । २०८१ असार ५ गतेसम संचालन हुइना तालिममे १७ जाने तालिम लेटी रहल बटै ।