कैलालीमे २० हजार जग्गाधनी पुर्जा वितरण कैना तयारी
पहुरा समाचारदाता
धनगढी, ९ चैत । राष्ट्रिय भूमि आयोग कैलाली इहे आर्थिक बरसमे २० हजार पुर्जा वितरण कैना तयारी करले बा ।
आयोगसे बिफेक रोज धनगढीमे पत्रकार सम्मेलन मार्फत कैलाली जिल्लाके प्रगति विवरण सार्वजनिक कैटी कम्तिमे २० हजार भूमिहीन, दलित, सुकुम्बासी, अव्यवस्थित बसोबासीहे जग्गाधनी पुर्जा वितरण कैना जानकारी डेहल हो ।
आयोगके कैलाली अध्यक्ष यज्ञराज उपाध्याय स्थानीय तहके जनप्रतिनिधिहुक्रे इच्छा शक्ति डेखैलेसे कम्तिमे उ संख्यामे इहे आर्थिक बरसमे जग्गा धनी लालपुर्जा वितरण कैना दाबी करलै ।
‘अब्बेक आयोग पृथक रहल बा, हम्रे इ आर्थिक बरसभित्रे २० हजार ढेरहे जग्गा धनी लाजपुर्जा वितरण कैना तयारी कैले बटि,’ उहाँ कहलै, ‘यदि स्थानीय तहके जनप्रतिनिधि तदारुकताके साथ आपन इच्छा शक्ति डेखैही कलेसे उ संख्यामे पुर्जा वितरण कैना कौनो समय नैलागी ।’
आयोगसे कैलालीके तीन स्थानीय तह बाहेक १० ठो स्थानीय तहमे भूमिहिन दलित, भूमिहिन सुकुम्बासी ओ अव्यवस्थित बसोबासीहुक्रनके नाप नक्साके कार्य सम्पन्न करटी रहल जनाइल बा ।
आयोगके अध्यक्ष उपाध्य टीकापुर नगरपालिका, जोशीपुर ओ जानकी गाउँपालिका बाहेक बाँकी स्थानीय तहमे नाप नक्साके कार्य निरन्तर जारी रहल बटैलै । उहाँ अब्बेसम १२ हजार ११० बिघा क्षेत्रफलमे नाप नक्सा हुइल फेन जानकारी डेलै ।
आयोगसे कृषि ओ आवासके लाग हालसम १६५ जनहनहे जग्गाधनी प्रमाण पत्र वितरण करल जनैले बा । जेम्ने धनगढी उपमहानगरपालिका वडा नम्बर ९ अन्र्तगत कृषिके लाग १२ ओ आवासके लाग १० सहित २२ जनहनहे प्रमाणपत्र उपलब्ध करैले बा । लक्मीचुहा नगरापलिका वडा नम्बर ३ मेआवासके लाग १३०, गोदावरी नगरपालिकामे ७ ओ बर्दगोरिया गाउँपालिकामे ६ जनहनहे प्रमाणपत्र उपलब्ध कराइल जनाइल बा ।
ओस्टके गोदावरी नगरपालिका अन्र्तगत भूमिहीन दलित, भूमिहीन सुकुम्बासी ५६ परिवारहे लालपुर्जा उपलब्ध करैना निर्णय कैलेसे फेन जग्गाधीनसे क्षेत्रफल चित्त नैबुभल ओरसे लेहे नैचाहल जनाइल बा । ओस्टके उहे नगरपालिका अन्र्गतके २२६ अव्यवस्थित बसोबासीनके वर्गीकरण ओ राजस्व सम्बन्धी सूचना जारी कैलमे फेन राजस्व दस्तुर ढेर रहल कहटी जग्गाधनीसे पुर्जा लेहे नैमानल आयोग जनैले बा । भूमि आयोग कैलालीमे एक लाख ३० हजार ७०१ जाने भूमिहीन दलित, भूमिहीन सुकुम्बासी ओ अव्यवस्थित बसोबासीनके निवेदन संकलन हुइल जनाइल बा ।
