रानाथारुसे वृहत होली मिलन तथा साँस्कृतिक कार्यक्रम

पहुरा समाचारदाता
कञ्चनपुर, ११ चैत । कञ्चनपुरमे बेलौरीमे रानाथारुनसे बृहत होली मिलन तथा साँस्कृतिक कार्यक्रम करले बटै ।

कञ्चनपुरके बेलौरी खुल्ला मञ्चमे “अपन साँस्कृतिक अपनही बचाइ’ कना मुल नारासहित रानाथारु भलमन्सा तथा पधना समिति बेलौरी नगरके आयोजना करल दुई दिने होली मिलन तथा साँस्कृतिक कार्यक्रम शनिच्चरके रोज सम्पन्न हुइल बा । भलमन्सा तथा पधना समिति बेलौरी नगरके आयोजना नेपाल रानाथारु समाज, थारु कल्याणकारीणीके सहकार्य एवं बेलौरी नगरपालिका कार्यालयके प्रबवद्र्धनमे दुई दिने होली मिलन तथा साँस्कृतिक कार्यक्रम सुरु हुइल हो ।

रङके पर्व होली रानाथारु समुदायसे विशेष महत्वके साथ मनैना करल बटै । रानाथारु समुदायके महान चाड होली पर्वके उपलक्ष्यमे शुभकामना आदान प्रदान तथा साँस्कृतिक कार्यक्रमके आयोजना हुइल रानाथारु भलमन्सा तथा पधना समिति बेलौरी नगर समितीके अध्यक्ष सुरेश कुमार बडायक जानकारी डेलै ।

कार्यक्रमके सभापतित्व रानाथारु भलमन्सा तथा पधना समिति बेलौरी नगर समितिके अध्यक्ष सुरेश कुमार बडायक, बरका पहुना संविधानसभा सदस्य एवं सुदुरपश्चिम् प्रदेश सभा सदस्य दिवान सिंह बिष्ट, बिशिष्ट पहुना कृष्णपुर नगरपालिकाके नगर उपप्रमुख द्रोपती राना, नेपाल रानाथारु समाजके कैलालीके अध्यक्ष लालबहादुर राना नागरिक उन्मुक्ति पार्टीके जिल्ला अध्यक्ष नन्दकुमार राना, बेलौरी नगरपालिका जनप्रतिनिधि लगायत स्थानीयहुकनके उल्लेखनीय सहभागिता रहल रहे ।

कार्यक्रममे सम्बोधन करटी बरका पहुना संविधानसभा सदस्य एवं सुदुरपश्चिम प्रदेशसभा सदस्य दिवान सिंह बिष्ट सक्कु समुदायमे रङके पर्व होलीके शुभकामना ज्ञापन करटी रानाथारुके भाषा सस्कृतीके लाग अपन ओरसे सेक्ना सहयोग कैना बटैलै । कार्यक्रमके समापनमे बोल्टी रानाथारु भलमन्सा तथा पधना समिति बेलौरी नगर समितिके अध्यक्ष सुरेशकुमार बडायक कार्यक्रममे सहभागिता जनैना सक्कु जनहनहे धन्यवाद ज्ञापन करटी रानाथारु समुदायसे प्रमुख चाडपर्वके रूपमे मनैना होली पर्व रहल ओरसे हर्षाेल्लासके साथ मनैना आग्रह करलै । कार्यक्रममे बेलौरी नगरपालिका भिटरके १६ ठो टिम होली मिलन कार्यक्रममे सहभागिता जनैले रहिट ।

कार्यक्रममे रानाथारु समुदायके पहिरनसहितके होली नाँच प्रदर्शनी करल रहे । कार्यक्रममे कञ्चनपुरके रानाथारुके कलाकार, सञ्चारकर्मीह्कनहे सम्मान ओ कार्यक्रममे उपस्थित बरका पहुना, विशिष्ट पहुनाहे मायाके चिनो प्रदान करल अध्यक्ष बडायक जानकारी डेलै । समापन समारोहके सञ्चालन श्रीशा राना करल रहिट ।