युनिक नेपालसे टिना खेती तालिम

पहुरा समाचारदाता
हसुलिया, १५ चैत । देशके प्रतिष्ठित लघुवित्त युनिक नेपाल लघुवित्त वित्तिय संस्था लिमिटेडके आयोजनामे व्यावसायिक टिना खेती तालिम सम्पन्न हुइल बा ।

युनिक नेपाल लघुवित्त वित्तीय संस्था लिमिटेड शाखा कार्यालय, हसुलिया कैलाली तथा केन्द्रीय कार्यालय ओ क्षेत्रीय कार्यालयके समन्वयमे व्यावसायिक टिना खेती तालिम सम्पन्न हुइल हो ।

दुई दिने व्यावसायिक टिना खेती तालिम कैलारी गाउँपालिकाके हसुलियामे चैत्र १४ ओ १५ गते सम्पन्न हुइल हो ।
उ तालिममे बोल्टी युनिक नेपाल लघुवित्त वित्तीय संस्था लि. का क्षेत्रीय अधिकृत सन्तकुमार चौधरी तालिमले टिना खेती करटी अइटी रहल दिदीबहिनीया, कुछ कैना योजना बनाइल ओ कुछ करम कहुइयाहे आत्मविश्वास बढाके उद्यमी बनैना सहज हुइना बटैलै ।

उहाँ युनिक नेपाल लघुवित्त वित्तीय संस्था लिमिटेडसे हरेक वर्ष ग्राहक सदस्य सीप विकास कार्यक्रम अन्तर्गत सदस्यहे तालिम प्रदान कैना ओ ओक्रे निरन्तरता स्वरुप तालिम प्रदान करल बटैलै ।

युनिक नेपाल लघुवित्त वित्तीय संस्था लिमिटेडसे २०५७ सालसे पाछे पारल वर्ग थारु, दलित, मुस्लिम, आदिवासी, जनजाती, सीमान्तकृत समुदाय गरिबीके रेखाटरे रहल महिला दिदीहुकनहे लघुवित्त कार्यक्रमसे आर्थिक रुपमे सवलीकरण कैना तथा क्षमता अभिवृद्धि कैना ग्रामीण क्षेत्रमे कार्य करटी आइल बा । हाल युनिक नेपाल लघुवित्त वित्तीय संस्था लिमिटडसंग करिब ९० हजारसे ढेर महिला दिदी बहिनीयासे लघुवित्त सेवा लेटी समुहमे बैठल बटै । युनिक नेपाल लघुवित्त वित्तीय संस्था लिमिटेडसे कैलाली, कञ्चनपुर, बाँके, बर्दिया, दाङ, कपिलवस्तु करके ६ ठो जिल्लामे ४१ ठो शाखा मार्फत सेवा करटी आइल बा ।

दुई दिने व्यावसायिक टिना खेती तालिमके सहजीकरण कैलारी गाउँपालिकाके कार्यालयके कृषि विकास शाखा प्रमुख मैयाँ कुमारी चौधरी ओ प्राविधिक सहायक बुद्धिराम चौधरी करल रहिट ।

कार्यक्रम युनिक नेपाल लघुवित्त वित्तीय संस्था लिमिटेडके शाखा प्रमुख निर्मल रैकाके सभापत्विमे हुइल रहे । दुई दिने व्यावसायिक टिना खेती तालिममे ३६ जाने समुहमे आवद्ध महिला दिदिबहिनीयाहुकनके सहभागिता रहल रहे ।