सुदूरपश्चिममे मुख्यमन्त्रीके लाग दाबी पेश कैना आह्वान
पहुरा समाचारदाता
धनगढी, २३ चैत । सुदूरपश्चिम प्रदेशके मुख्यमन्त्रीके लाग दाबी पेश कैना आह्वान करल बा । प्रदेश प्रमुख नजिर मिँया शुकके रोज संविधानके धारा १६८ (२) अनुसार दुई वा दुईसे ढेर दलके बहुमत प्राप्त करे सेक्ना प्रदेश सभा सदस्यहे मुख्यमन्त्रीके लाग एक विज्ञप्ती जारी कैटी दाबी पेश कैना आह्वान करल हुइट । मुख्यमन्त्रीके लाग दाबी पेश कैना समय बैशाख २ गते साँझ ५ बजेसम रहल बा ।
‘माननीय मुख्यमन्त्री कमल बहादुर शाह २०८० साल चैत २२ गते संविधानके धारा १६९ (१) के खण्ड (क) बमोजिम मुख्यमन्त्री पदसे राजीनामा डेहल ओरसे माननीय प्रदेश प्रमुख नजिर मियाँ ज्यु नेपालके संविधानके धारा १६८ (२) बमोजिम सुदूरपश्चिम प्रदेश सभामे प्रतिनिधित्व करुइया दुई वा दुईसे ढेर दलके समर्थनमे बहमुत प्राप्त करे सेक्ना प्रदेश सभाके सदस्यहे सुदूरपश्चिमके मुख्यमन्त्री नियुक्त करक लाग मिति २०८१ बैशाख २ गते अँट्वार साँझ ५ बजे भिटट्र दाबी पेश कैना आह्वान करल बा’ प्रदेश प्रमुख कार्यालयके प्रवक्ता दीर्घराज भट्टसे हस्ताक्षर करल विज्ञप्तीमे उल्लेख करल बा ।
५३ सदस्यीय सुदूरपश्चिम प्रदेश सभामे हाल ५२ जाने सदस्य रहल बाटै । लावा सरकार बनाइक लाग २७ जनहनके समर्थन आवश्यक परठ् ।
सङ्घीय सरकारमे रहल नेकपा (एमाले), नेकपा ( माओवादी) सँग १०÷१० जाने ओ नेकपा (एकीकृत समाजवादीसँग चार जाने प्रदेश सभा सदस्य सहित २४ जाने किल रहल बाटै । प्रदेश सभामे नेपाली कांग्रेसके १८, राप्रपा ओ स्वतन्त्रके १÷१ जाने प्रदेश सभा सदस्य रहल बाटै ।
