थारु समुदायके सांस्कृतिक रुपमे छुट्टे पहिचान बाः प्रदेश प्रमुख मियाँ
पहुरा समाचारदाता
धनगढी, २४ चैत । सुदूरपश्चिम प्रदेशके प्रदेश प्रमुख नजिर मियाँ थारु समुदाय सांस्कृतिक रुपमे धनी रहल बटैले बाटै ।
बर्दगोरिया इभेन्ट एन्ड मार्केटिङ प्रालिके आयोजनामे शनिच्चरके रोज धनगढीमे हुइल थारु राष्ट्रिय म्युजिक अवार्ड २०८० कार्यक्रमहे सम्बोधन कैटी प्रदेश प्रमुख मियाँ थारु समुदाय अन्य समुदायसे सांस्कृतिक रुपमे धनी रहल बटाइल हुइट ।
‘थारु समुदाय सांस्कृतिक रुपमे छुट्टे पहिचान बनाइल समुदाय हो, आदिवासी जनजाति हो’, उहाँ कहलै, ‘इ समुदाय देशके एक खालके सुन्दरता बह्रैले बा कलेसे इ समुदाय नेपालके एकठो सुन्दर पक्षहो कना मोर बुझाइ रहल बा ।’
कार्यक्रमके बर्का पहुना समेत रहल प्रदेश प्रमुख मियाँ नेपालमे थारु ओ मुस्लिम समुदायहे मधेसी समुदायमे राखल बेला थारु ओ मुस्लिम समुदाय संयुक्त रुपमे आन्दोलन करल फेन बटाइल रहिट । उहाँ अपने संविधान सभा सदस्य रहल बेला थारु समुदायसे समन्वय सहकार्य कैटी आन्दोलन मार्फत थारु ओ मुस्लिम समुदाय छुट्टे पहिचान सहित अधिकार मागल फेन बटाइल रहिट ।
कार्यक्रम बर्दगोरिया इभेन्ट एन्ड मार्केटिङ प्रालिके अध्यक्ष हरेन्द्र चौधरीके थारु भाषा र संस्कृति संरक्षण ओ प्रचार प्रसार कैना उद्देश्यसे नेपालमे पहिलचो थारु राष्ट्रिय म्युजिक अवार्ड आयोजना करल बटाइल रहिट । कार्यक्रममे प्रदेश सभा सदस्य गीता चौधरी, भजनी नगरपालिकाके नगरप्रमुख केवल चौधरी लगायत मनतब्य राखल रहिट ।
अवार्ड कार्यक्रममे सर्वोत्कृष्ट आधुनिक गायनतर्फ पुरुष ओ महिला, सर्वोत्कृष्ट लोकगीत गायनतर्फ पुरुष ओ महिला, सर्वोत्कृष्ट पप गायनतर्फ पुरुष ओ महिला, सर्वोत्कृष्ट गायनतर्फ पुरुष ओ महिलाहे अवार्ड सहित सम्मान करल बा ।
ओस्टके सर्वोत्कृष्ट फिल्म स्क्रिप्ट लेखन, गीत स्क्रिप्ट लेखन, फिल्म निर्देशक, म्युजिक भिडियो निर्देशक, द्वन्द निर्देशक, संगीतकार, छायांकार, दृश्य सम्पादक, सर्वोत्कृष्ट नव प्रतिभातर्फ पुरुष ओ महिला, सर्वोत्कृष्ट एल्बम, गीत, मोडलतर्फ पुरुष ओ महिला, सर्वोत्कृष्ट युगल मोडल, म्युजिक कम्पनीहे हे अवार्ड सहित सम्मान करल बा ।
