मुर्गाहवामे चिरैं भजहर मनागिल

पहुरा समाचारदाता
पहलमानपुर, २५ चैत । कैलालीके घोडाघोडी नगरपालिका–११ मुर्गाहवामे शनिच्चरके रोज चिरैं भजहर मनागिल बा ।

गाउँक बरका गुरुवा चुलराम चौधरी, केसौका भोकारी चौधरी, भल्मन्सा रामअसरे चौधरीके नेतृत्वमे थारु समुदायसे मनाजिना चिरैं भजहर विधिवत रुपमे मनागिल हो ।

होलीपाछे चैत महिनाके ओजरीयाके अन्तिम शुक परे व सोम्मार, थारुहुकनक चिरैं/चरैं टिहुवार मनैना करजाइठ । महिला स्वतन्त्रता, सखी दिवसके रुपमे रहल चिरैं भजहर गाउँ गाउँमे मनैना सुरु हुइल बा । कैलालीके टमान गाउँमे यी टिहुवार मनासेकल ओ कुछ गाउँमे मनैटी रहल बा ।

चिरैं भजहरमे सहायक भल्मन्सा राजबहादुर चौधरी, सचिव प्रदेशु चौधरी, कोषाध्यक्ष माया चौधरी, सल्लाहकार चन्द्र चौधरी, रामपतिदेवी चौधरी, विरेन्द्रलाल चौधरी, विहारीलाल चौधरी, रामबहादुर चौधरीलगायत मुर्गाहवा गाउँक प्रत्येक घरके एक जाने महिलाके सहभगिता रहल रहे । यी गाउँमे १५० घरधुरी रहल बा । भजहरमे टमान थारु सांस्कृतिक नाँच ओ रहरङगी कैगिल रहे ।