गोहुँक लरुवामे आगी नइलगैना कैलारी गाउँपालिकासे आग्रह
पहुरा समाचारदाता
हसुलिया, ६ बैशाख । आजकाल्ह हावाहुरी खोब चलल ओ उहीसे आगी लग्ना भारी सम्भावाना हुइल ओरसे गोँहु कटसेकलपाछे लरुवामे आगी नइलगैना कैलारी गाउँपालिकासे आग्रह करले बा ।
गाउँपालिकाके प्रमुख प्रशासकीय अधिकृत लक्ष्मीदत्त भट्ट विफेक रोज सार्वजनिक सूचना जारी करटी १ से ९ वडाके वासीहु्कनहे खेतुवामे गोहुँ काटसेकलपाछे आगी नइलगैना आग्रह करल रहिट । यदि लगाइल पैलेसे कानून बमोजिम सजायके भागेदार स्वय हुइना सार्वजनिक सूचनामे कहल बा ।
ओस्टेक करके कैलारी गाउँपालिका वडा नम्बर २ कैलारी गाउँक खेतुवामे लगाइ आगीसे स्थानीयबासी ओ प्रहरी मिल्के नियन्त्रणमे लेहल इलाका प्रहरी कार्यालय हसुलियाके प्रमुख लोकेन्द्र बहादुर चन्द बटैलै । उहाँ खेतुवाक लरुवामे लगाइल आगी समयमे नियन्त्रणमे लेगिल मने भुसा केल जरे पाइल बटै ।
गाउँपालिका अध्यक्ष राजसमझ चौधरी गोहुक लरुवा जरैना क्रममे उ आगी गाउँघरमे पुगे सेक्ना ओरसे आगी लगैना अनुरोध करलै । उहाँ कहलै, २ बरस पहिले कैलारी गाउँपालिका वडा नम्बर ७ विपतपुर मुक्तकमैया बस्तीमेफे खेतुवम लगाइल आगी गाउँ पुगके बस्ती सखाप हुइल रहे ।’ अब्बे हावा हुरी चल्टी रहल ओरसे आगी नइलगैना मजा रना उहाँ कहलै ।
कञ्चनपुरमे २० जानेक गोहुँबालीमे आगलागी, आठ बिघाके गोहुँबाली जरके नष्ट
कञ्चनपुरमे गोहुँबालीमे विफेक रोज आगलागी हुइल बा । जिल्लाके दोधरा चाँदनी नगरपालिका ७ के विरबहादुर सुनार सहित २० जानेक गोहुँबालीमे आगलागी हुइल हो । दुपहर करिब एक बजेओर लागल आगी २ः ३० ममे नियन्त्रण लेहल हो । आगलागीसे करिब आठ विघामे लगाइल गोहुँबाली जरके नष्ट हु्इल प्रहरीके प्रारम्भीक अनुसन्धानसे खुलल बा । विद्युतके तार सर्ट हुके आगलागी हुइल जिल्ला प्रहरी कार्यालय कञ्चनपुरके प्रवक्ता प्रहरी नायव उपरीक्षक उमेशराज जोशी बटैंलै । घटनाक पुर्ण विवरण आइल नइहो । घटनाबारे थप अनुसन्धान हुइटी रहल बा ।
