चार वर्षमे १२७९ जाने पक्राउ, ९०८ उप्पर मुद्दा दायर
पहुरा समाचारदाता
धनगढी, १३ बैशाख । कैलाली जिल्लामे अवैध लागु औषधसहिट चार बर्षमे १२ सय ७९ जाने पक्राउ परल बटै । जिल्ला प्रहरी कार्यालय कैलालीसे आर्थिक बर्ष २०७७/०७८ से आर्थिक बर्ष २०८०/०८१ बैशाख १० गतेसमके तथ्यांक सार्वजनिक करटी १२ सय ७९ जान अवैध लाग्ु औषध सहिट पक्राउ परल जनैले बा ।
जिल्ला प्रहरी कार्यालय कैलालीके प्रवक्ता कविन्द्र बहादुर बोहराके अनुसार आर्थिक बर्ष २०७७/०७८ सालमे ७९ जाने, आर्थिक बर्ष २०७८/०७९ सालमे ३१५ जाने, आर्थिक बर्ष २०७९/०८० सालमे ५२२ जाने ओ आर्थिक बर्ष २०८०/०८१ सालके बैशाख १० गतेसम ३५२ जाने पक्राउ परल जनैले बटै । वसहेक चार बर्षमे ९ सय ८ जाने विरुद्ध मुद्दा चलाइलफे वहाँ जनैलै । प्रहरीसे ओइन उप्पर ब्राउन सुगर, नाइट्रोभट ओ चरेश मुद्दा शिर्षकमे म्ुद्दा चलैले बा । चार बरसके अवधिमे ११ सय ८३ पुरुष ओ ९६ महिला रहल बटै ।
अवैध लागु औषधसहित तीन जाने पक्राउ
कैलालीके धनगढी उपमहानगरपालिकासे अवैध लागु औषधसहित तीन जाने पक्राउ परल बटै ।
धनगढी उप–महानगरपालिका वडा नं. ०७ से वडा नम्बर २ बैठना बर्ष १८ के दिलिप रानाहे शंका लागके चेकजाँच करेबेर ९० मिलिग्राम लागुऔषध खैरो हेरोईन बरामद करटी पक्राउ कैगिल बा । धनगढी उप–महानगरपालिका वडा नं. ०३ त्रिनगरसे बर्ष १९ के चेतना सेटठीके थेनसे ३६० मिलिग्राम लागु औषध खैरो हेरोईन बरामद करटी पक्राउ कैगिल जिल्ला प्रहरी कार्यालय कैलालीके प्रवक्ता कविन्द्र बहादुर बोहरा बटैलै ।
ओस्टेक करके जिल्ला कैलाली धनगढी उप–महानगरपालिका वडा नं. १२ जुगेडासे बैठना बर्ष १९ के मानविर चौधरी ओ बर्ष १९ के सबिन महतोके साथसे ५ ग्राम ४३० मिलिग्राम लागु औषध खैरोहेरोईन बरामद कैगिल बा ।
चोरी हुइल तीन मोटरसाइकल बरामद
कञ्चनपुर वेतकोट नगरपालिका वडा नं. ०२ बैठना बर्ष १८ के सन्देश खत्री ओ बर्ष १९ के लोकेश बोहरासे चोरी करल तीन ठो मोटरसाइकल बरामद कैगिल बा ।
कैलाली धनगढी उप–महानगरपलिका वडा नं. ०४ बसपार्क बैठना राम बहादुर शाहीके सु.प.प्र.–०१–०१० प २४६ नम्बरके २२० सिसिके पल्सर यिहे बैशाख १० गते हुकाने घरमे पार्किङ करके धारल अवस्थामे चोरी ह्ुइलमे वडा नं. ०४ मे ११ गते फाप्लासे बरामद हुइल बा ।
कैलाली धनगढी उप–महानगरपलिका वडा नं. ०३ बैठना बर्ष २२ निरज चौधरीके सु.प.प्र.–०१–०१० प ७९७८ नम्बरके २०० एनएस पल्सर बैशाख १० गते वडा नम्बर ३ स्वस्तिक अस्पताल लग्गेसे चोरी हुइलमे उहे वडामे ११ गते फाप्लासे बरामद हुइल बा ।
ओस्टेक करके कैलाली धनगढी उप–महानगरपलिका वडा नं. ०४ बैठना राहुल ओझाके सु.प.प्र.–०१–००९ प ९५८४ नम्बरके ३५० सिसिके रोयल ईनफिल्ड क्लासिक मोटरसाइकल बैशाख १० गते उहे वडा उत्तर बेहडी स्थित गुरास डेरीसे चोरी हुइलमे उहे वडा वडामे ११ गते बसपार्कसे बरामद हुइल जिल्ला प्रहरी कार्यालय कैलालीके प्रवक्ता प्रवक्ता कविन्द्र बहादुर बोहरा बटैलै ।
