धनगढीमे २९० जनहन अपाङगता सहायता सामग्री वितरण कैना
पहुरा समाचारदाता
धनगढी, १३ बैशाख । धनगढी उपमहानगरपालिकासे यी वर्षफे अपाङता रहल व्यक्तिहे निःशुल्क सहायता सामग्री वितरण करेक लाग बा ।
गैल वर्ष १८९ जनहनहे सहायता सामग्री वितरण करल उपमहानगरसे यी वर्ष भर २९० जनहनहे सामग्री वितरण कैना हुइल हो । नगर क्षेत्रमे बसोबास कैना अपाङता रहल व्यक्तिके खोजी कैना पाँच ठाउँमे स्क्रिनिङ शिविर धारके अपाङता हुइल व्यक्तिहुकनके पहिचान करल हो ।
उपमहानगरके वडा नम्बर १८ के आधारभूत स्वास्थ्य सेवा केन्द्र फूलबारीमे चैत २१ गते लागल शिविरमे ६० जनहनहे नापजाँच करेबेर ५५ जनहनहे अपाङता सामग्री आवश्यक रहल उपमहानगर जनैले बा । ओस्टेक करके चैत २९ गते वडा नम्बर १७ के सहरी स्वास्थ्य केन्द्र धुर्जन्नामे लागल शिविरमे ७० जाने, बैशाख ९ गते वडा नम्बर १० के घुइयाँघाट सहरी स्वास्थ्य केन्द्रमे लागल शिविरमे ४५ जाने अपाङगता रहल व्यक्ति फेला परल हुइट ।
ओस्टेक करके वडा नम्बर ११ के घोड्सुवा सहरी स्वास्थ्य केन्द्रमे बैशाख १० गते लागल शिविरमे ३५ तथा बैशाख १२ गते नगरपालिका परिसरमे लागल शिविरसे ८५ जाने अपाङगता हुइल व्यक्ति पत्ता लागल हुइट । स्क्रिनिङ शिविरमे पत्ता लागल अपाङगता हुइल व्यक्तिहुकनहे असार १५ भिटर सहायता सामग्री वितरण करसेक्ना महिला विकास अधिकृत पंकजा जोशी बटैली । उहाँ अपाङगता हुइल व्यक्ति शिविर लागल ठाउँमे अइना समस्या हुइना ठानके धनगढीके टमान पाँच ठाउँमे शिविर लगैना करल बटैली ।
गैल वर्षफे धनगढीके १७९ जाने अपाङगता हुइल व्यक्तिहे २०५ मेरिक सहायता सामग्री निःशुल्क वितरण करल महिला विकास अधिकृत पंकजा जोशी बटैली । “गत वर्ष १७९ जनहनहे २०५ मेरिक सहायता सामग्री वितरण करल रहे । सहायता सामग्री वितरण कैना ३२ लाख खर्च हु्इल रहे । यी वर्षफे सहायता सामग्री वितरण कैना टमान पाँच ठाउँमे स्क्रिनिङ शिविर धारके नापजाँच करल हो,’ महिला विकास अधिकृत जोशी कहली ।
यी वर्ष स्वीकृत वार्षिक कार्यक्रममे १८ लाख बजेट विनियोजन करलमे धनगढीके सर्वाङिण अपाङगता विकास समाजसे अपाङगता सहायता सामग्री वितरण कैना ९ लाखमे टेण्डर पाइल हो । यी वर्ष शारीरिक अपाङगता हुइल व्यक्तिहुकनहे ह्विलचेयर, बैसाखीसहित चस्मा तथा कान नइसुन्न व्यक्तिहे समेत सहायता सामग्री प्रदान कैना हुइल बा । बजेट अपुग हुइल अवस्थामे स्क्रिनिङ करल सक्कु व्यक्तिहे सहायता सामग्री डेना समस्या नइहुइना उपमहानगर जनैले बा । सक्कु मेरके अपाङगता रहल व्यक्तिहे खोजीखोजी सहायता सामग्री वितरण कैना उपमहानगरपालिकाके नीति रहल महिला विकास अधिकृत जोशी बटैली ।
