कठरिया भाषा कक्षा सञ्चालन

पहुरा समाचारदाता
सुखड, ७ जेठ । कैलालीमे कठरिया समुदायके भाषा लोप हुइ नैडेना उद्देश्य सहित कठरिया समुदायके युवा युवतीके लाग कक्षा सञ्चालन करल बा । कठरिया भाषा सरासर पह्रना ओ लिख्ना कक्षा सञ्चालन हुइलपाछे कठरिया समुदायके व्यक्तिहे कतिपय बिसराइल आपन भाषा सम्झक लाग सजिल हुइल बटैले बाटै ।

हिमाली आदिवासी समाज काठमाडौँ ओ कठरिया समाज नेपालके सहकार्यमे कैलालीके टमान ठाउँमे १५ कक्षा सञ्चालन हुइल बा । एक महिनाके लाग सञ्चालन हुइल उक्त कक्षामे कठरिया समुदायके देवनागरीमे लिख्ना ओ पह्रे सेक्ना २५/३० जाने सहभागी रहल जनाइल बा । वैशाख पहिल अँठ्वारसे कक्षा सुरु हुइल जनैटी हिमाली आदिवासी समाज नेपालके फिल्ड सुपरभाइजर टीआर कठरिया कठरिया समुदायके नेपाली सरासर पह्रना लिखे सेक्ना, अन्य भाषा मिलाके बोलुइयाहे एक महिना कक्षा सञ्चालनके व्यवस्था करल जानकारी डेलै ।

कक्षासे अन्य भाषा पह्रना ओ लिख्ना अब्बल रहल व्यक्तित्वहे आपन भाषामे समेत कुछ चिज लिख्ना ओ पह्रना उत्प्रेरणा मिल्ना बटाइल बा । कैलालीके धनगढी उपमहानगरपालिका, टीकापुर, लम्कीचुहा, घोडाघोडी, भजनी, गौरीगङ्गा नगरपालिका तथा जोशीपुर, कैलारी, बर्दगोरिया गाउँपालिकामे कठरिया समुदायके स्थायी बसोबास रहल बा । भारतके उत्तर प्रदेशस्थित लखिम खिरी क्षेत्रमे समेत कठरिया समुदायके बसोबास रहल जनाइल बा ।

कक्षा सञ्चालन उल्लेखित पालिका अन्तर्गत कठरिया समुदाय रहल मुनवा, लक्कड, घुसरी, सिमरी, तुल्सिपुर, भुरवा, मुडा, सुवरखाल, बगुलइहिया, सिसैया, तपा, कोंटा, चर्रा, पवेरा ओ लौसामे हुइटी रहल बा । उ मध्ये शनिच्चरके चर्रामे कक्षा समापन हुइल ओ अन्य ठाउँमे समेत अन्तिम चरणमे पुगल फिल्ड सुपरभाइजर कठरिया जनैलै ।

कक्षा सञ्चालन कैनासे पूर्व सरोकारवालाके बैठक, स्थलगत सर्वेक्षण, पाठ्यपुस्तक निर्माणलगायत दुईदिने शिक्षक तालिम आयोजना करल जनाइल बा । कक्षामे सहभागीहुक्रनहे अपनेहुक्रे समाजमे टमान समुदायसँगके सङ्गत ओ विद्यालयमे समेत देवनागरी लिपिमे पह्रना हुइल ओरसे आपन भाषा अल्मलैना अवस्था आइल बटैलै । उहाँहुक्रे कठरिया समुदायके भाषाहे सरासर पह्रना ओ लिख्ना कक्षासे सहयोग पुगाइल बटैले बाटै कलेसे कठरिया समुदायके भाषा, सांस्कृतिक संरक्षणमे समेत सहयोग पुगाइल प्रतिक्रिया डेले बाटै ।