बाल विवाह अन्त्यके लाग सामूहिक प्रयास आवश्यक
पहुरा समाचारदाता
धनगढी, ८ जेठ । सक्कु सरोकारवालाके सामूहिक प्रयाससे बाल विवाह अन्त्य करे सेक्ना एक कार्यक्रमके सहभागीहुक्रे जोड डेले बाटै ।
बालिका दुहली नैहुइट, नेपाल कना राष्ट्रिय सञ्जालके आयोजनामे मंगरके रोज धनगढीमे हुइल एक कार्यक्रमके सहभागिहुक्रे ओइसीन बटाइल हुइट । एनएनएस डब्ल्यूओके चक्र विक बाल विवाह अन्त्यके लाग संघ, प्रदेश ओ स्थानीय तहसे प्राथामकिताके साथ लगानी सहितके कार्यक्रम सञ्चालन करे पर्ना जोड डेहल रहिट ।
‘गरिवी, अशिक्षा लगायत टमान कारणसे समाजमे बाल विवाह भयावह रहल बा’, उहाँ कहलै, ‘बाल विवाह अन्त्यके लाग सरकारसे बालबालिका तथा किशोरकिशोरीनके शिक्षा, स्वास्थ्य, आर्थिक आयआर्जन तथा रोजगारी ओर उन्मुख कराके आत्मनिर्भर बनैना आवश्यक रहल बा ।’
ओस्टके बाल विवाह अन्त्यके लाग अभिभावक, आमा समूह, उपभोक्ता समूह, किशोरी समूह, युवा क्लब, सामाजिक अगुवा, धार्मिक, सांस्कृतिक, राजनीतिक दल तथा भातृसंगठन लगायतके व्यक्ति तथा समूहके साझेदारी ओ सहभागितामे बालबालिका उपर हुइना सक्कु मेरके हिंसा तथा भेदभाव विरुद्धके अभियान सञ्चालन करे पर्ना औँल्यागिल रहे ।
साथे भोजके कानुनी उमेरके उल्लघंन करलमे हुइना दण्ड ओ सजाय लगायत बाल विवाहके असरबारे पाठ्यपुस्तकमे समावेश कैके पठनपाठन हुइ पर्नामे फेन जोड डेगिल रहे ।
कार्यक्रममे सहभागि विद्यार्थी गोविन्दराज अवस्थी ढेर बालबालिका लागु औषध दुव्र्यशनी ओर फँसल ओरसे विद्यालयमे बाल संरक्षण मापदण्ड निर्माण कैके जोखिम तथा हिंसामे परल बालबालिकाहे मनोसाजिक सेवा प्रवाह करे पर्ना बटैलै ।
सञ्जालके विस्तारीकरण ओ बाल विवाह अन्त्यके लाग प्रदेशमे हुइटी रहल पहलबारे विषयमे छलफल हुइल रहे । कार्यक्रममे बालबालिका दुलही नैहुइट, नेपालके अध्यक्ष निरिजना भट्ट सञ्जाल बारे जानकारी डेहल रही । उहाँ सञ्जाल ७ ठो संस्था आवद्ध होके २०१२ से स्थापना हुइल बटैली । ओस्टके सञ्जाल २०१४ मे विश्वमे बालविवाह अन्त्य कैना बनल अन्तराष्ट्रिय सचिवालयमे आवद्ध हुइल रहे कलेसे हाल इ सञ्जालमे ३० संस्था आवद्ध रहल जनाइल बा ।
सञ्जालसे नेपालमे बाल विवाह अन्त्यके लाग राष्ट्रिय नीति, रणनीति निर्माणमे नेपाल सरकारसँग सहकार्य लगायत नेपाल सरकारके टमान तहसँग बाल विवाह अन्त्यके लाग पैरवी कैटी आइल बा ।
कार्यक्रम सिविन नेपाल कैलालीके सहकार्यमे हुइल रहे कलेसे स्वागत मन्तव्य सिविन नेपालके कार्यक्रम अधिकृत हरिलाल चौधरी करले रहिट ।
