कैलारीमे बाल भेला सुरु
पहुरा समाचारदाता
हसुलिया, ९ जेठ । बालबालिकाहुकनके प्रतिभा उजागर करेक लाग कैलारी गाउँपालिकामे बुधके रोजसे दुई दिने बाल भेला सुरु हुइल बा ।
कैलारी गाउँपालिका अन्र्तगतके बालबालिकाहुकनके क्षमता विकास संरक्षण ओ सम्बद्र्धन कार्यहे तदारुकताके साथे उठान करेक लाग योजना निर्माण कैना उद्देश्यसे बाल भेला सुरु हुइल हो ।
कैलारी गाउँपालिका महिला तथा वालबालिका शाखाके आयोजना तथा सामुदायिक विकास केन्द्र (सिडिसी, डोटी), बाल कल्याण संघ टीकापुरके समन्वयमे बाल भेला हुइटी रहल बा । गाउँपालिका अध्यक्ष राजसमझ चौधरीके वरका पहुनामे हुइल कार्यक्रममे उहाँ बालबालिकाहुकनमे टमान मेरिक प्रतिभा नुकल मने प्रस्तुतीकरण मौकासे बञ्चित हुइल बटैलै ।
विशिष्ट पहुना गाउँपालिका उपाध्यक्ष भगवतीकुमारी चौधरी बालबालिका काल्हके कर्णधार रहल बटैलै । बालबालिकाहुकनहे अब्बेसे अवसर प्रदान करलेसे ओइने पाछेक दिनमे कुछफे करे सेक्ना हिम्मत आँट अइना बटैली ।
गाउँपालिकाके प्रमुख प्रशासकीय अधिकृत लक्ष्मीदत्त भट्ट बाल भेलाके शुभकामना डेटी बालबालिकाके लाग गाउँपालिकासे गैर सरकारी संस्थासे समन्वय करके आघे बह्रना बटैलै ।
महिला तथा वालबालिका शाखा प्रमुख बालकुमारी चौधरी बालभेलाके शुभकामना व्यक्त करल रही । बाल भेलाके उदघाटन कार्यक्रममे वडा नम्बर १ के वडाअध्यक्ष धोज हरिपाल बोहरा, वडा नम्बर २ के वडा अध्यक्ष विकास चौधरी, वडा नम्बर ३ के वडा अध्यक्ष सन्तराम चौधरी, वडा नम्बर ४ के वडा अध्यक्ष ठागुराम चौधरी, वडा नम्बर ५ के वडाअध्यक्ष विष्णु प्रसाद चौधरी, वडा नम्बर ६ के वडा अध्यक्ष प्रेम बहादुर चौधरी, गाउँपालिका प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम, वडा नम्बर ८ के वडा अध्यक्ष तारामल कठरिया, शिक्षा शाखा प्रमुख गणेश प्रसाद मिश्र, सामाजिक विकास शाखा प्रमुख यगम कलेललगायत सहभागिता रहे ।
बाल भेला कैलारी गाउँपालिका एकसे नौ वडाके ६० जाने बालबालिकाहुक्रे टमान प्रतिभा प्रस्तुत करटी रहल बटैलै । बाल भेला कार्यक्रम उदघाटन इको क्लवके अध्यक्ष अर्जुन चौधरीके अध्यक्षतामे हुइल रहे । बालबालिकाहुक्रे टमान मेरिक क्रियाकलाप करटी रहल बटै ।
