मुक्तकमैया समस्या समाधान विषयमे अन्तरक्रिया

पहुरा समाचारदाता
हसुलिया, १४ जेठ । कैलारी गाउँपालिका वडा नम्बर ७ मिलनपुर मुक्तकमैयामे सोम्मारके रोज मुक्तकमैया समस्या समाधान बिषयक अन्तरक्रिया कार्यक्रम हुइल बा ।

कैलारी गाउँपालिका अध्यक्ष राजसमझ चौधरीके बरका पहुनामे हुइल कार्यक्रममे उहाँ मुक्तकमैयाहुकनहे टमान सीपसे जोरके आत्मनिर्भर बनाइक लाग पालिका लागी परल बटैलै ।

२०७९ सालमे चुनावके मुहमे विपतपुर मुक्तकमैया बस्तीमे आगलागी हुइलपाछे ढेर धनके क्षति हुइल रहे,’ गाउँपालिका अध्यक्ष कहलै, ‘पालिकाके सहकार्यमे पूर्ण क्षतिसे प्रदेश ओ गाउँपालिकाके सहकार्य सहयोगमे लौव घर बनल, बाँकी ठोर ठोर क्षति हुइल घरके लागफे पहल हुइटी रहल बा ।’

कैलारीके टमान वडामे बसोबास करल मुक्तकमैयाके समस्या अभिन ज्यु के त्यू बा, सरकारसे ओइनके जग्गा व्यवस्था कैना जरुरी बा, नइटे कहु जग्गा डेखाडेलेसे पालिकासेफे उ प्रक्रिया आघे बह्राई सेक्जाइठ ।

कार्यक्रममे टमान नेपाली काँग्रेस कैलारी गाउँपालिका सभापति कृष्ण प्रसाद चौधरी, राप्रपा नेपालके होमबहादुर गुरुङ, कैलारी गाउँपालिकाके पूर्व अध्यक्ष लाजुराम चौधरी, कैलारी गाउँपालिकाके प्रवक्ता तथा वडा नम्बर ७ वडा अध्यक्ष दिपेन्द्र बहादुर बम, वडा नम्बर ३ के वडा अध्यक्ष सन्तराम चौधरी, मुक्त कमैया समाजके केन्द्रीय अध्यक्ष पशुपति चौधरी लगायतके सहभागिता रहे ।कार्यक्रम मुक्त कमैया समाज कैलालीके आयोजनामे हुइल रहे ।