सीपके सदुपयोग कैलेसे स्थानीयस्तरमे रोजगारीके सम्भावना बाः गाउँपालिका अध्यक्ष
पहुरा समाचारदाता
हसुलिया, ४ असार । सीपके सदुपयोग करलेसे स्थानीयस्तरके टमान मेरिक रोजगारी व्यवसाय संचालन करे सेक्ना कैलारी गाउँपालिकाके अध्यक्ष राजसमझ चौधरी बटैले बटै ।
कैलारी गाउँपालिका खानेपानी सरसफाई तथा स्वच्छता शाखासे आयोजना कैगिल एक हप्ते गहिरो धारा (नल्का) जडान तथा प्लाम्बिङ सम्बन्धी सीपमुलक तालिम समापन कार्यक्रममे सम्बोधन करटी उहाँ उ बाट बत्वाइल रहिट ।
स्थानीय तहलगायत टमान संघसंस्थाके आयोजनामे संचालन कैगिल तालिममे एक व्यक्ति टमान चो सहभागी हुइठै,’ गाउँपालिका अध्यक्ष कहलै, ‘तालिममे प्रमाण लेके जैना परिपाटी बा । मने सीपके सदुपयोग नैकरल विल्गाइठ । तालिममे सहभागीहु्क्रे अपने सीपके प्रर्दशन ओ सदुपयोग करलेसे रोजगारीके लाग जेहोर टेहोर भौतारे नैपरी ।’
उहाँ कहलै, ‘पहिले गाउँघरमे कपरा सिलेक लाग पहाडसे और जातीहे बोलाई परे, पक्की घर बनाइक लाग, इट्टा पारेक लाग, टमान मेरिक कामके लाग बाजीनहे बोलाई परे अब्बे थारु समुदायके व्यक्ति सीप सिखके बहुट आघे बह्रसेकल बटै ।’
कैलारी गाउँपालिकामे खानेपानीके काम तिब्र गतिमे बह्रटी बा, प्लाम्बरके ढेर आवश्यकता यी तालिममे सहभागीहुक्रे सीपके सदुपयोग करलेसे अपने गाउँठाउँमे रोजगारीके सृजना हुइनाफे गाउँपालिका अध्यक्ष बटैलै ।सीप ओ शिक्षा रहल व्यक्ति ओकर सदुपयोग करलेसे कहुफे जाके काम करे सेक्ना ओ पैसा कमाई सेक्नाफे उहाँ बटैलै ।
गाउँपालिका उपाध्यक्ष भगवतीकुमारी चौधरी सीपके सदुपयोग करलेसे आम्दानीके स्रोत बह्राई सेक्ना बटैली । अब्बे पक्की घर बनटा, घर घरमे पानीके धारा जडान हुइटा,’ गाउँपालिका उपाध्यक्ष कहली, ‘ओकर लाग धनगढी लगायत टमान ठाउँसे गहिरो धारा (नल्का) जडान तथा प्लाम्बिङके लाग मनै बोलाई परे आब अपने गाउँठाउँके जनशक्ति उत्पादन हुइल बटै । बाहेर नाने नैपरी, यहाँके युवाफे अपने गाउँठाउमे रोजगारके करके आय स्रोत बह्राई सेक्ही ।’
गाउँघरके लउण्डा लउण्डी टमान मेरिक सीप सिखल मने सीपके परिक्षण नइहुइल कारण प्रमाणपत्र घरे धारके बैठे पर्ना बाध्य रहल उहाँ बटैली ।
उहाँ कहली, ‘तालिम प्राप्त यूवाहुक्रनके सीप परिक्षण हुइलेसे ओइने स्वदेश ओ विदेशमे काम पाई सेक्ही । अब्बे सीपके परिक्षण जरुरी रहलफे उहाँ बटैली । गाउँघर वा शहर बजारमे सीपमुलक आयमुलक कार्यमे थारु समुदायके यूवा बहुट आघे बह्रसेकल कहटी तालिममे लेहल सीपके सदुपयोग कैना उहाँ सहभागीहुकनहे आग्रह करली ।
तालिममे सहभागी सन्तोषकुमार चौधरी अपनेहुक्रे अब्े आवश्यकता अनुसार तालिम पाइल ओरसे यकर सदुपयोग कैना बटैलै । ओइने तालिममे सहभागी नेहा चौधरीफे गहिरो धारा (नल्का) जडान तथा प्लाम्बिङके तालिममे सहभागी हुके कुछ करे सेक्ना आत्मबल बह्रल बटैली ।
तालिम समापन कार्यक्रमके संचालन कैलारी गाउँपालिकाके सामाजिक विकास शाखाके प्रमुख यगम कलेल करल रहिट । उ तालिममे कैलारी गाउँपालिकाके टमान वडाके २७ जाने सहभागी हुइल कैलारी गाउँपालिका खानेपानी सरसफाई तथा स्वच्छता शाखाके प्रमुख शंकरदत्त अवस्थी बटैलै ।
