कुपोषण हटैना पोषणके जरुरतः गाउँपालिका उपाध्यक्ष
पहुरा समाचारदाता
हसुलिया, ११ कार्तिक । कैलारी गाउँपालिकामे पालिकास्तरीय परियोजना सल्लाहकार समिति एवं पोषण तथा खाद्य सुरक्षा निर्देशक समितिसंगके बैठक तथा छलफल कार्यक्रम अँटवार रोज सम्पन्न हुइल बा ।
कैलारी गाउँपालिका स्वास्थ्य शाखाके आयोजनामे याक नेपाल, केयर नेपालसे सञ्चालन करल पोषण परियोजना अन्र्तगत ‘आमा बाल कल्याण साझेदारी कार्यक्रम (एमसीडब्लुपीपी)के गतिविधिबारे छलफल हुइल हो । कैलारी गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे कुपोषण हटैना पोषण कार्यक्रम आवश्यक रहल बटैली । उहाँ कहली, ‘याक नेपाल ओ केयर नेपालसे कैलारी गाउँपालिकाके ४ ओ ७ नम्बर वडामे रहल बालबालिकाहे लक्षित करके कार्यक्रम संचालन करले बा । जिहीसे आर्थिक अवस्था कम्जोर रहल परिवारके वालबालिकाहे कुपोषण हुइनासे बचाई सेक्जाई ।’
उ परियोजनाके गतिविधि मजा रहल कहटी पालिकाके सक्कु वडामे रहल सीमान्तकृत वर्गके बालबालिकाहे समेटे सेक्लेसे और रना उहाँ बटैली ।
गाउँपालिका उपाध्यक्ष कहली, ‘हम्रेफे उपाध्यक्ष समावेशी कार्यक्रम अन्र्तगत पालिकामे रहल स्वास्थ्य संस्थाके बर्थिङ सेन्टरमे बच्चा जन्माइल सुत्केरी डाईहुकनहे पोषण सामाग्री उपहार कार्यक्रम सञ्चालन करले बटी । उहीहे भर्खरके लरकोह्या डाईसंगे बच्चनके लाग पोषण ओ हाइजिनिक किट समावेश कैगिल बा ।’
पोषण परियोजना अन्र्तगत ‘आमा बाल कल्याण साझेदारी कार्यक्रम (एमसीडब्लुपीपी)के गतिविधिहे प्रभावकारी बनाइक लाग स्वास्थ्य शाखा, महिला तथा बालबालिका शाखा, कृषि शाखा ओ पशु शाखा समन्वय करके जैना आवश्यक रना उहाँ बटैली ।
कार्यक्रममे स्वास्थ्य शाखाके प्रमुख नरेशकुमार चौधरी कैलारीमे लर्का होमडेलि भरी शुन्य रहल बटैलै । उहाँ कहलै, ‘कैलारी गाउँपालिकामे अब्बे गर्भवती महिला स्वास्थ्य संस्थामे केल बच्चा जन्मैठै । जिहीहे बच्चा डाईहे जोखिमसे बचैना सहजुल हुइल बा ।,
स्वास्थ्य शाखासे पूर्ण खोप सुनिश्चित पालिका घोषणा कैटी आइल बटैलै । ओस्टेक उहाँ पोषण सम्बन्धी नीति तथा रणनीतिबारे प्रस्तुतीकरण करल रहिट ।
कार्यक्रममे महिला तथा बालबालिका शाखा प्रमख बालकु्मारी चौधरी अपन शाखासे सामाजिक ओ आर्थिक शसक्तीकरण, सीप विकासके क्षेत्रमे जोर डेहल बटैली । उहाँ ग, ओ घ वर्गहे अपाङता रहल हुकनहे सीप विकाससे जोरना काम कैगिलफे जनैली ।
कृषि शाखा प्रमुख मैया चौधरी पोषण कार्यक्रमहे सहयोग पुगैना मेरके कृषक महिला समुहे कृषि सामाग्री, विउविजन वितरणके साथे टिना खेतीमे सहयोग करल बटैली । पशु शाखा प्रमुख सुर्य प्रसाद चौधरी पोषण कार्यक्रम हो कहिके सपोट नैकरल मने कृषकहुकनहे तालिम प्रदान कैगिल बटैलै ।
कार्यक्रममे याक नेपाल कार्यकारी निर्देशक डबल बहादुर बम, केयर नेपालके अशोक बहादुर रावल, सपना पौडेल परियोजनाके सञ्चालन करल पोषण परियोजना अन्र्तगत ‘आमा बाल कल्याण साझेदारी कार्यक्रम (एमसीडब्लुपीपी)के गतिविधिबारे जानकारी डेहल रहिट ।
कार्यक्रममे यिहे विच गाउँपालिका प्रमुखके संयोजकत्वमे पोषण परियोजना सल्लाहकार समिति गठन कैगिल बा । जेम्जे गाउँपालिका उपाध्यक्ष सदस्य, प्रमुख प्रशासकीय अधिकृत सदस्य, स्वास्थ्य शाखा प्रमुख, महिला तथा बालबालिका शाखा, कृषि शाखा प्रमुख, पशु शाखा प्रमुख, सामाजिक विकास शाखा प्रमुखलगायत अन्य सरोकारवाला सदस्य रना बटै ।
कार्यक्रममे प्रमुख प्रशासकीय अधिकृत खगेन्द्रराज जोशी, वडा नम्बर १ के वडा अध्यक्ष धोज हरिपाल बोहरा, वडा नम्बर २ के वडा अध्यक्ष विकास चौधरी, वडा नम्बर ३ के वडा अध्यक्ष सन्तराम चौधरी, वडा नम्बर ५ के वडा अध्यक्ष विष्णु प्रसाद चौधरी, वडा नम्बर ६ के वडा अध्यक्ष प्रेमबहादुर चौधरी, वडा नम्बर ८ के वडा अध्यक्ष तारामल कठरिया, वडा नम्बर ९ के वडा अध्यक्ष खेमराज चौधरीलगायत कार्यपालिका सदस्य, टमान शाखाके प्रमुख तथा प्रतिनिधिहुकनके सहभागिता रहे ।
