नागरिकके सुरक्षा राज्यके होः आयोग
पहुरा समाचारदाता
धनगढी, २८ भदौं । धनगढी उपमहानगरपालिका १ के १९ वर्षिय रोशन विक शुकके रोज विहान जिल्ला प्रहरी कार्यालय कैलालीके थुनुवा कक्षमे रहल शौचालयमे गाँरझुलल अवस्थामे फेला पर्लै । चोरी आरोपमे भदौ २२ गते पक्राउ परल उहाँ मुवल अवस्थामे फेला परल हुइट ।
प्रहरी उ दिन विकसे आत्महत्या करल बटैलेसे फेन मृतकके आफन्तहुुक्रे भर रोशक ज्यान कुटपिटसे हुइल दाबी करटी आइल बाटै । उहाँहुक्रे घटनाके सत्यतथ्य छानविनके माग करटी आइल बाटै ।
यहेबीच सामाचारके विषयहे लेके दिनेश सञ्चार गृहमे आक्रमण संगे उहाँ कार्यरत पत्रकारहुुन कुटपिट फेन हुइल बा । घटना झनझन जटिल बन्टी गैलपाछे शनिच्चरके रोज राष्ट्रिय मानवअधिकार आयोगके टोल जिल्ला प्रहरी कार्यालय कैलालीके थुनुवा कक्षके अनुमगन कर्ले बा ।
आयोगके सुदूरपश्चिम प्रादेशिक कार्यालय धनगढीके प्रमुख झंकर रावल नेतृत्वके टोली थुनुवा कक्षके अनुगमन करके उहाँके वस्तुस्थिति ओ घट्नाके बारेमे जिल्ला प्रहरी कार्यालय कैलालीके प्रमुख प्रहरी उपरिक्षक अनुपम समशेर जबराससे थप जानकारी लेहल रहे ।
घटनावारे आयोगके गम्भीर ध्यानाकषर्ण हुइल बटैटी रावल कौनो फेन हिरासतमे रहल व्यक्तिके ज्यान जैना कलेक बहुट संवेदनशिल विषय रहल बटैलै । हिरासतमे रहल व्यक्तिके ज्यू ज्यानके रक्षा कर्ना सम्बन्धित निकायके दायित्व रहल उल्लेख कर्लै । ओस्टके घटनावारे अनुसन्धान करेक लाग प्रहरी उपरिक्षक राजिव बस्नेतके संयोजकत्वमे छानविन टोली गठन करगिल बा ।
पत्रकार महासंघके २४ घन्टे अल्टिमेटम
धनगढीस्थित दिनेश सञ्चार गृहमे पेलके पत्रकार उप्पर हातपात करुइयाहे पक्राउ करेक पर्ना कहटी नेपाल पत्रकार महासंघ प्रशासनहे २४ घण्टे अल्टिमेटम डेले बा ।
घटना हुइल दुई दिनसम अपराधी पक्रे नैसेकल कहटी नेपाल पत्रकार महासंघ कैलाली शाखा अन्टिमेटम डेहल हो । आज (अट्वार)के रोजसम अपराधीहे पक्राउ नैकर्लेसे चरणवद्ध सशक्त आन्दोलन कर्ना महासंघकै कैलाली अध्यक्ष जगत साउँद बटैलै ।
कैलालीके प्रमुख जिल्ला अधिकारी यज्ञराज बोहराहे शनिच्चरके रोज ध्यानाकर्षण पत्र बुझौटी दोषिहे पक्राउ नैकर्लेसे सशक्त आन्दोलन कर्ना चेतावनी डेहल हुइट ।
ध्यानाकर्षण पत्र बुझ्टी प्रमुख जिल्ला अधिकारी बोहरा आज अट्वारके रोजसम पक्राउ कर्र्ना आश्वासन डेले बाटै । ‘हम्रे अनुसन्धान करटी बाटी । आजसम घटनामे संलग्नहुकन पक्रब ।’
प्रहरीसे डेहल जानकारी अनुसार शुकके रोज धनगढीमे थुनुवा कक्षभिट्रे १९ वर्षीय युवकसे आत्महत्या कना समाचार प्रकाशन करल रहे । आत्महत्या कना समाचार झुठ हो, यि समाचार डिलिट करेक पर्ना कहटी १५/२० जहनके समुह दिनेश सञ्चार गृहमे पेलके पत्रकारहुकन उप्पर कुटपिट करल रहे ।
सम्बन्धित समाचार
